Неговото Блаженство Архиепископот охридски и Митрополит скопски г. др Јован, сеправославно признатиот и познатиот канонски Претстојател на древната Охридска Архиепископија, после повеќегодишните прогони, малтретирања, апсења и затворања – исклучиво заради неговата непоколеблива определеност за единството на Црквата Божја, заради неговата припадност на вселенското Православие преку Српската Патријаршија и заради доследната, исповедничка борба против расколничкиот менталитет и антицрковниот етнофилетизам, - под лажно обвинение за наводно затајување и проневера како резултат на политички мотивираниот и исконструиран квазисудски процес од сталинистички тип, организиран на нескриено барање на расколничката организација, којашто себеси се означува со називот „Македонска Православна Црква“, и после најновата судска фарса во Велес, осуден е на 11-ти Мај, на две ипол годишна робија. Ова е единствен пример во современа Европа – а можеби и воопшто во цивилизираниот свет – државните органи, по нарачка, најгрубо кршејќи го и сопственото законодавство и меѓународните норми и конвенции, да вршат вакво сурово насилие над Православната Црква и нејзините законити високи претставници.

Светиот Архијерејски Собор на Српската Православна Црква, во чијашто канонска јурисдикција се наоѓа и автономната Охридска Архиепископија, на своето редовно мајско заседание протестира и го осудува ова беспримерно насилие и гонење, спроведено под маската за заштита на правниот поредок. Молитвено и во евангелска љубов Соборот е без престан со своите браќа и сестри во Охридската Архиепископија, а особено со нивниот Архипастир којшто поднесува страдање за единството на Православната Црква Христова. Тој страда заради правда, а властите го држат во затвор со строг режим и покрај неговата тешка здравствена состојба. При тоа, Соборот апелира:

• до сите сестрински Православни Цркви ширум вселената;
• до сите останати христијански Цркви во светот;
• до Светскиот Совет на Црквите, Конференцијата на Европските Цркви и другите христијански организации;
• до владата на Република Македонија;
• до владите и надлежните државни органи на правно уредените држави, во прв ред демократските;
• до меѓународните институции и
• до институциите и организациите за заштита на човековите права и верските слободи;

да пружат духовна, морална, правна и секаква друга возможна поддршка на затвореникот на совеста, Архиепископот Јован, и да придонесат за неговото што поскоро ослободување од затворот.

Белград, 16-ти Мај 2012 год.

Свет Архијерејски Собор на Српската Православна Црква