19.08.2017
Архиепископот Јован служеше на градската слава во Требиње
На празникот Преображение Господово, Неговото Блаженство Архиепископот охридски и Митрополит скопски г.г. Јован началствуваше на свечената Архиерејска Литургија во градот Требиње, каде што овој празник е градска слава. Нему му сослужуваа Преосветените Епископи захумско-херцеговски и приморски г. Григориј и вомировениот захумско-херцеговски и приморски г. Атанасиј, заедно со свештенослужители од различни епархии на Српската Православна Црква.
На Литургијата, после прочитаното Евангелие, Неговото Блаженство Архиепископот Јован со беседа му се обрати на верниот народ. По светата Литургија, беше осветено грозје и прекршен славски колач пред самиот храм и во градската управа.
Во вечерните часови на истиот ден, во портата на храмот, беше осветен споменик на блаженоупокоениот Патријарх српски Павле, а после вечерната богослужба, беше одржана свечена литија на улиците на градот Требиње. Во литијата, покрај Архиепископот Јован учествуваа и Преосветените Епископи Јован славонски, Јоаникиј будимљанско-никшички, Григориј захумско-херцеговски и приморски и вомировениот Епископ Атанасиј.
